Willemstad, 9 di desèmber – Autobusbedrijf Curaçao (ABC), a risibí 8 (ocho) konvoi nobo komo parti di e proseso di renovashon di su flota.

Na okashon di entrega di e konvoinan, minister Shalton Hato, remplasando minister di Transporte Públiko Charles Cooper, a menshoná ku minister Cooper ta kontentu ku despues di warda ansiosamente porfin e konvoinan a yega. Minister Hato a sigui bisa ku kompra di konvoinan akí no ta trata di invershon den vehíkulo so. “E ta invershon den kalidat di bida di nos hendenan. Kada konvoi ta representá mas konfòrt pa nos pasaheronan, un operashon mas efisiente pero sobre todo un servisio ku ta inspirá konfiansa den ABC Busbedrijf. i ta duna ABC mas espasio pa mantenshon optimal di nos flota, loke ta kontribuí na un servisio mas konfiabel i duradero”, minister Hato a bisa.

ABC ta gradesí ministerio di VVRP pa finansiá kompra di e konvoinan. Ku e ocho konvoinan akí ABC ta dal e promé paso den e proseso di optimalisashon di su servisionan. Den 2026, ABC lo siguí enfoká riba konfòrt i eksperensia di su pasaheronan, ku introdukshon di WI-FI den e konvoinan , mehorashon di e parada di busnan ku mas informashon i modernisashon di e sistema di pago pa hasi e proseso mas fásil i sigur pa nos klientenan.

Di e manera akí, ABC lo sigui traha ku dedikashon pa ofresé un sistema di Transporte Públiko ku ta krese huntu ku e nesesidatnan di e komunidat. E trabounan aki lo fortalesé konfiansa di e pasaheronan den nos organisashon i servisionan, i kontribuí na un futuro di mobilidat mas sostenibel pa un i tur na Kòrsou.

ABC ta orguyoso ku e yegada di e 8 konvoinan pasobra nan ta indikashon ku ABC ta progresando di un manera positivo pa fortalesé Transporte Públiko na Kòrsou.