Términonan i Kondishonnan

pa hür un konvoi

Reglanan Relashoná ku Hürmentu di Konvoi

Ora di hür un konvoi ku Autobusbedrijf Curaçao (ABC) e siguiente términonan i kondishonnan, komo tambe un kódigo di kondukta, ta aplikabel.

Pago mester tuma lugá ún siman promé ku fecha di transporte na ofisina prinsipal di ABC na Industrieterrein Buena Vista z/n.
Un kliente ku kanselá su reservashon mas ku 24 ora promé ku e kareda tuma lugá, no mester paga ABC nada.
ABC ta kobra un kliente ku kanselá su reservashon den menos ku 24 ora promé ku e kareda, e oranan pa kua el a reservá e bùs.
ABC ta mantené e derecho pa den kasonan di emergensia kanselá reservashon di un bùs, pero lo avisá e kliente ku tin e bùs reservá, mas tardá 24 ora promé ku e kareda tuma lugá.
E persona, òf instansia, kende a hasi e reservashon, ta keda responsabel pa e biahe i pa komportashon di e pasaheronan abordo.
E persona responsabel pa e biahe mester ta mayor di edat.
ABC no ta para responsabel pa konsumo eksesivo òf inapropiá di alkohòl abordo;
Pasaheronan mester atené nan mes na reglanan di siguridat abordo di bùs.
Reservashon ta di mínimo ún ora.
Oranan èkstra no reservá mester kanselá mesora serka e shofùr na final di e ruta.
Semper e konvoi ta yega 15 minüt promé ku e ora di inisio di e paseo.

Ta prohibí pa transportá mas persona ku e kantidat aprobá ku e vehíkulo por karga.
Ta prohibí pa transportá menornan di edat kende no ta akompañá pa personanan mayor di edat.
Ta prohibí pa durante e paseo, ofresé bibida alkohóliko na menornan di edat.
Ta prohibí pa durante e paseo, tira kualke opheto for di bentana riba kaminda públiko.
Ta prohibí pa drenta bùs ku arma.
ABC ta mantené e derecho pa kanselá un biahe sin duna restitushon, si na pareser di e shofùr ún òf mas pasahero den bùs ta okashoná problema, ta kousa peliger òf ta falta ku òrdu públiko.