Tokante ABC
historia i organisashon
Autobusbedrijf Curaçao
N.V. Autobusbedrijf Curaçao, mihó konosí den boka di pueblo komo ABC Busbedrijf òf ABC, ta brinda é servisio di transporte públiko na pueblo di Kòrsou. E meta prinsipal ta pa brinda e servisio di transportá kliente di un punta pa otro te na e destinashon deseá. ABC ta ofresé mas ku simpel transporte públiko; e ta ofresé e kliente un eksperensia agradabel na un preis pagabel.
Nos mishon
“Ofresé transporte públiko aksesibel, sigur, konfiabel, agradebl i pagabel pa tur usuario”.
Vishon
“E kompania di gobiernu ku ta unifiká i regulá transporte públiko na Kòrsou na bienestar di tur usuario”.
Nos balornan
Traha huntu i semper forma parti di e solushon.
Ta Integro, proaktivo i kolegial.
Ta informa su mes debidamente i komunika ku respet.
Ta asumi su responsabilidat pa ku kliente i koleganan.
Ta puntual i semper ta ofrese servisio ku un aktitut positivo.
Historia
Autobusbedrijf Curaçao N.V. (ABC Busbedrijf òf ABC) ta un kompanía di transporte públiko ku a ser fundá riba 1 di dezèmber 1943, komo un servisio di e asina yamá Gobièrnu Sentral. E meta tabata pa mantené e servisio di transporte den región di Punda i Otrabanda na Kòrsou i pa kuminsá ku un organisashon di transporte públiko. Na komienso di e kompanía tabatin solamente 1 ruta i 20 empleado. Awendía e kompanía a krese i tin mas ku 137 empleado; 81 ta shofùr. E kompanía ta disponé di 35 konvoi ku ta laborá riba 21 ruta tur dia.
Gobièrnu Sentral no a kuminsá ku e servisio akí ku e meta pa generá ganashi, pero mas bien e tabatin e interes pa sirbi i mehorá e servisio di transporte públiko. Pues e meta prinsipal tabata pa krea posibilidatnan pa asina tur hende por a yega nan trabou na tempu i tur mucha por a yega skol i pa trese tur ama di kas stat.
Na momentu ku e resultadonan finansiero tabata satisfaktorio, Gobièrnu Sentral a disidí ku a yega momentu pa duna oportunidat na hendenan privá ku tabatin interes pa invertí kapital den e servisio akí.
Entre 1943 pa 1972 transporte tabata konsistí di:
Taksi òf outo di hür
Esaki tabata kompletamente den man di doñonan privá, i tabata dirigí riba transporte di turista.
Bus chikí; e asina yamá “autobus”
E bus chikí por a transportá seis persona i ántes e “Amerikaanse personenauto” tabata e outo uzá. Tambe tabata uza “stationcars” pa por a transportá ocho persona i “Volkswagenbusjes” pa transportá nuebe persona. Esaki tambe tabata den man di doñonan privá.
Bùs grandi
Transporte di konvoi, e bùsnan grandi ku por a transportá mínimo 30 hende, tabata manehá pa dos kompanía grandi; Bakhuisbusline, un kompania privá i ABC. E kompaníanan akí tabata manehá mas ruta kompará ku e bùsnan chikitu.
Pues banda di ABC tabatin otro kompanía ku tabata funshoná riba nan mes. E tempu ei ABC tabatin konkurensianan fuerte pa por a mantené su eksistensia. Tabatin kasi 350 “autobus” ku tabata kore trayektonan liber; nan tabatin pèrmit pa kore e “grote Amerikaanse personenauto” òf un bùs chikí ku por a transportá máksimo (8) ocho pasahero pa un pago.
Na 1972 Gobièrnu Sentral a pasa ABC pa Gobièrnu Insular, Gobièrnu di Kòrsou, ku te dia di awe ta manehá e kompanía.
Struktura di Organisashon
Gobièrnu di Kòrsou ta 100% akshonista di Autobusbedrijf Curacao N.V. (ABC Busbedrijf). ABC Busbedrijf ta kai bou di e Ministerio di Tráfiko, Transporte i Planifikashon Urbano. E kompanía ta responsabel pa ehekushon di e maneho di transporte públiko di Gobièrnu di Kòrsou. E Minister di Trafiko, Transporte i Planifikashon Urbano, na nòmber di e akshonista, a nombra un hunta di komisario ku tin e enkargo di supervisá i akonsehá e grupo di maneho.
Den e struktura di e organisashon, ABC ta konsistí di un direktor i departamentonan ku ta pertenesé na e grupo di maneho:
- Sekretariado
- Departamento di Merkadeo i Komunikashon
- Departamento di Servisio Tékniko
- Departamento di Servisio di Transporte
- Departamento Finansiero i Departamento di Rekurso Humano.
Entrante 1 di Mei 2016 a nombra Drs. John R. Cijntje komo Direktor General di Autobusbedrijf Curaçao N.V. (ABC)
E vishon di Sr. Cijntje tokante ABC ta:
“E kompania di gobiernu ku ta unifiká i regulá transporte públiko na Kòrsou na bienestar di tur usuario”.
