Diseñá bo parada ideal pa Kòrsou!
Bo idea. Bo diseño. Nos parada di bus.
Bo tin un idea original pa un parada di bus na Kòrsou? Laga bo kreatividat briya!
Bo no tin ku ta un diseñador: partisipá grátis ku chèns di gana e premio máksimo!
PARTISIPASHON GRÁTIS • NO MESTER TIN EKSPERENSIA • INDIVIDUAL ÒF DEN TIM
E reto
ABC i UOOW ta en buska di un diseño pa paradanan di bus ku ménos ku 500 pasahero pa siman (Klase II). Kombiná kreatividat i originalidat ku aksesibilidat i sostenibilidat.
Diseñá un parada di bus sigur, fásil pa rekonosé i ku un kosto rasonabel pa konstruí, adekuá pa nos klima, ku sombra, protekshon kontra áwaseru, lugá pa sinta i informashon kla tokante e biahe. Tene kuenta ku resistensia kontra tormenta i un durashon di bida di por lo ménos 15 aña.
E ganadó lo traha huntu ku e arkitekto di kas riba e elaborashon tékniko di e diseño.
Kon ta evaluá bo diseño?
Despues di kontrolá e kondishonnan di partisipashon i e eksigensianan obligatorio, e hurado ta evaluá e diseñonan bálido di forma anónimo i ta skohe un máksimo di dies finalista. Públiko tambe ta vota: e voto di públiko ta konta pa 20% di e puntuashon final. Ta anunsiá e ganadónan durante e entrega di premio.
Fechanan importante
|
Aktividat |
Fecha |
|
Inskripshon |
Te ku 13 di novèmber 2026 |
|
Entrega di diseño |
Pa mas tardá 30 di novèmber 2026 |
|
Anunsio di top 10 |
18 di desèmber 2026 |
|
Votashon di públiko |
18 di desèmber 2026 te ku 8 di yanüari 2027 |
|
Anunsio di ganadónan i entrega di premio |
14 di yanüari 2027 |
Kiko bo por gana?
1er premio: XCG 3.500
2do premio: XCG 1.000
3er premio: XCG 500
E otro finalistanan ta risibí un premio di apresio.
Ken por partisipá?
- Tur hende ku ta biba na Kòrsou i ku tin un sédula bálido.
- Bo por partisipá individual òf den tim.
- Bo no mester tin diploma ni eksperensia den diseño.
- Bo tin ménos ku 18 aña? E ora ei bo mester entregá pèrmit skirbí i un kopia di sédula di bo mayor òf tutor.
Kiko bo mester entregá?
- Un splikashon di máksimo un A4.
- Por lo ménos tres skèts: bista di dilanti, bista di banda i perspektiva.
- Máksimo dos blachi di presentashon A3, preferiblemente ku medidanan.
- Formularionan A i B yená i un kopia di sédula bálido pa kada partisipante.
Dibuhá na man òf digital: tur dos ta permití! No mester entregá dibuhonan tékniko di konstrukshon. Bo por entregá bo diseño na Papiamentu, Hulandes, Ingles òf Spaño.
Inskribí pa e konkurso di diseño
Partisipá i duna Kòrsou un parada di bus nobo!
Yena e formulario aki pa mas tardá 13 di novèmber 2026 pa inskribí pa e konkurso habrí di diseño pa paradanan di bus na Kòrsou (number di referensia 2026-392). Aki bo ta inskribí komo partisipante.
Bo ta entregá bo diseño despues, pa mas tardá 30 di novèmber 2026, via e-mail na marketing@autobusbedrijf.com òf personalmente na nos ofisina prinsipal na Industrieterrein Buena Vista z/n.
Despues di inskripshon bo ta risibí via e-mail un number di partisipante, e reglamento kompleto di e konkurso, e eksigensianan i e formularionan.
Kontakto
Bo tin pregunta? Manda un e-mail na marketing@autobusbedrijf.com.
E página aki ta un resúmen. E reglanan den e reglamento kompleto di e konkurso ta determinante.